Kompanija je dobila isporuku “voćnog soka umjesto rolni toalet papira i peškira za ruke”, objasnio je pilot.
Francuski portal La Depeche objašnjava da u današnje vrijeme postoji mnogo razloga za odlaganje leta, ali da avion ne poleti zbog nedostatka toalet papira nije do sada zabilježeno.
Međutim, ovo se zaista dogodilo, prošlog četvrtka, 15. decembra, na aerodromu u Mančesteru, u avionu belgijske niskobudžetne avio kompanije Tui Airways. Putnici su trebali da polete oko 9:55 ujutro na letu BY718 za Šarm El Šeik, ali su bili spriječeni u tome.
Prema riječima pilota aviona: “dobavljač je napravio grešku u porudžbini i isporučio voćni sok umjesto rolni toalet papira i peškira za toalete”. Sredinom popodneva posada je konačno odlučila da preuzme stvari u svoje ruke i otišla je u avion druge kompanije na dopunu zaliha.
A onda je nastao novi problem u trenutku kada su se putnici najzad ponadali da će avion da poleti. Avion nije mogao da poleti jer je u to vrijeme posada već završila svoje zakonsko radno vrijeme.
Putnici su stoga morali da čekaju do sljedećeg dana da bi stigli u Egipat. Oni su, srećom, bili smješteni u hotelu.
Avion je konačno poletio u petak, 16. decembra, oko 11 sati, više od 25 sati od prvobitno utvrđenog polaska.
