ZVANIČNO
Rafael Nadal i definitivno neće igrati Rolan Garos.
Španski teniser je potvrdio da se nije oporavio od povrede.
Na pres konferenciji, Rafa je objasnio koliko mu teško pada što neće igrati baš u Parizu gdje je ostvario toliko uspjeha.
“Oporavak od povrede koju sam zadobio u Australiji nije išao kako se očekivalo. Rolan Garos je tako postao nemoguć. Neću moći da budem tamo poslije mnogo godina, to je veliki udarac s obzirom na to šta ovaj turnir znači za mene,” kazao je na početku obraćanja Nadal.
On ne zna kada će se vratiti, ali je izvjesno da će preskočiti i Vimbldon, vrlo vjerovatno i US open.
“U ovom trenutku nijesam spreman da se takmičim na nivou koji mi je potreban. Moram da stavim karijeru po strani, probaću da regenerišem svoje tijelo. Neću da pričam o datumu povratka, kada budem spreman pokušaću. Dejvis kup u septembru je neki cilj. Pokušaću da se spremim za sljedeću godinu koja će, mislim, biti moja posljednja godina u karijeri,” kazao je Nadal i dodao:
“Ako bih sada igrao, bojim se da ne bih mogao biti tu sljedeće godine. Namjera mi je da mi 2024. bude posljednja i da mogu da igram turnire koje ja želim, da se oprostim od onih koji su mi obilježili karijeru.”
